ភ្នំពេញ៖ មន្ត្រីកសិកម្មនៅតាមបណ្តាខេត្តដែលមានផ្ទុះជំងឺប៉េស្តជ្រូកអាហ្វ្រិក បានឲ្យដឹងថា គិតមកដល់ថ្ងៃចន្ទនេះ ស្ថានភាពនៃការឆ្លងរាលដាលជំងឺនៅតំបន់ផ្ទុះជំងឺមួយចំនួន មានភាពធូរស្រាលជាងមុនហើយ ខណៈដែលអាជ្ញាធរបាននិងកំពុងបន្តតាមដានទប់ស្កាត់ ព្រមទាំងផ្អាកការចិញ្ចឹមសត្វជ្រូកឡើងវិញមួយរយៈរហូតដល់តំបន់ផ្ទុះជំងឺត្រូវបានប្រាកដថា មិនមានវត្តមានមេរោគនេះទៀត។
ករណីជំងឺបេស្តជ្រូកអាហ្រ្វិក បានផ្ទុះឡើងនៅខេត្តចំនួន៥ ក្នុងប្រទេសកម្ពុជា គិតចាប់តាំងពីដើមខែមេសាមក ក្នុងនោះ មានខេត្តរតនគិរី ខេត្តត្បូងឃ្មុំ ខេត្តស្វាយរៀង ខេត្តតាកែវ និងខេត្តកណ្តាល ដែលនាំឲ្យសត្វជ្រូកប្រមាណ ៣ពាន់ក្បាល ត្រូវបានងាប់និងសម្លាប់ចោល។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្វាយរៀង លោក ថាច់ រតនា បានមានប្រសាសន៍ថា ស្ថានភាពនៃការឆ្លងរាលដាលជំងឺប៉េស្តជ្រូកអាហ្វ្រិកនៅឃុំក្រោលគោ ស្រុកស្វាយជ្រុំនោះ មានស្ថានភាពធូរស្រាលហើយ ដោយមន្ត្រីជំនាញបានប្រចាំការនៅតំបន់នោះ និងបានសហការជាមួយអាជ្ញាធរមូលដ្ឋាន និងប្រជាពលរដ្ឋ ធ្វើការបាញ់ថ្នាំសម្លាប់មេរោគ និងទប់ស្កាត់ការធ្វើចរាចរណ៍ជ្រូកចេញចូលក្នុងតំបន់នោះផងដែរ។
លោកថា៖ «មកដល់ពេលនេះមានសត្វជ្រូកចំនួន ៩៥ក្បាលបានងាប់និងសម្លាប់ចោល ក្នុងចំណោមសត្វជ្រូកចំនួន ១០៨ក្បាល ហើយបច្ចុប្បន្ន យើងបាននិងកំពុងដើរបាញ់ថ្នាំសម្លាប់មេរោគនៅតំបន់ផ្ទុះ និងតំបន់ជុំវិញនោះក្នុងរង្វង់៣គីឡូម៉ែត្រ ក៏ដូចជានៅតាមតំបន់នៅជាប់ព្រំដែនកម្ពុជា-វៀតណាម និងផ្សព្វផ្សាយប្រជាពលរដ្ឋឲ្យគាត់បានយល់ និងតាមដានស្ថានភាពសុខភាពសត្វជ្រូករបស់ប្រជាពលរដ្ឋផងដែរ»។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវ លោក ញិប ស្រ៊ន បានមានប្រសាសន៍ថា ស្ថានភាពជំងឺប៉េស្តជ្រូកអាហ្វ្រិកនៅស្រុកអង្គរបូរីនោះមានភាពស្ងប់ស្ងាត់ ដោយសារតែមន្ត្រីជំនាញបានសហការជាមួយអាជ្ញាធរ និងប្រជាកសិករចិញ្ចឹមជ្រូក បានឯកភាពគ្នាសម្លាប់ចោលសត្វជ្រូកទាំងអស់ដែលនៅសេសសល់ពីការឆ្លងជំងឺនេះតែម្តង។ លោកថា៖ «សត្វជ្រូកដែលបានឈឺងាប់នៅភូមិអំពិលនោះមាន១១១ក្បាល ហើយនៅសល់ ១១ក្បាលទៀត យើងបានសម្រេចសម្លាប់ចោលតែម្តង ដើម្បីកុំឲ្យឆ្លងរាលដាលទៅតំបន់ផ្សេងទៀត»។
បើតាមលោក ញិប ស៊្រន បច្ចុប្បន្ន មន្ត្រីជំនាញបាននិងកំពុងបន្តបាញ់ថ្នាំសម្លាប់មេរោគនៅតាមទ្រុងជ្រូកទាំងនោះ និងបានផ្អាកការចិញ្ចឹមជ្រូកឡើងវិញរបស់កសិករមួយរយៈពេលសិន ដើម្បីឲ្យប្រាកដថាតំបន់នោះគ្មានមេរោគប៉េស្តជ្រូកអាហ្វ្រិកទៀតទេ។ លោកថា៖ «យើងក៏បាននិងកំពុងឃ្លាំមើលកុំឲ្យមានចលនាសត្វចូលក្នុងតំបន់ហ្នឹង ហើយក៏មិនទាន់ឲ្យពលរដ្ឋចិញ្ចឹមឡើងវិញដែរ ចាំមើលដល់វាស្ងាត់សិន ព្រោះមេរោគវាអាចសំងំក្នុងដីឬសម្ភារៈចិញ្ចឹមក្នុងរង្វង់ ៩០ថ្ងៃឯណោះ អីចឹងយើងរងចាំឲ្យផុត Cycle នៃជំងឺនោះសិន រហូតដល់មានការប្រកាសឲ្យចិញ្ចឹមឡើងវិញពីក្រសួង បានយើងបើកឲ្យគាត់ចិញ្ចឹមឡើងវិញ»។
ចំណែក ប្រធានការិយាល័យផលិតកម្មបសុព្យាបាលនៃមន្ទីរកសិកម្មខេត្តកណ្តាល លោក អ៊ុន ដារិន បានឲ្យដឹងថា ករណីជំងឺប៉េស្តជ្រូកនៅស្រុកស្អាង និងស្រុកខ្សាច់កណ្តាល ត្រូវបានទប់ស្កាត់មិនឲ្យឆ្លងរាលដាលទៅកាន់តំបន់ផ្សេងទេ ប៉ុន្តែបច្ចុប្បន្ននៅតែមានសត្វជ្រូកប្រមាណ ២០ ទៅ ៥០ក្បាល នៅតែបន្តងាប់ជារៀងរាល់ថ្ងៃក្នុងតំបន់ផ្ទុះជំងឺ។ លោកថា៖ «ជ្រូកបានងាប់និងសម្លាប់ចោល មានប្រមាណជា ៩០០ក្បាល ស្មើនឹង៦០%នៃសត្វជ្រូកដែលមាននៅតំបន់ផ្ទុះជាង ១៧០០ក្បាលនោះ វាចេះតែងាប់បន្តបន្ទាប់ ដោយសារគ្មានថ្នាំព្យាបាល និងវាក់សាំងចាក់ការពារទេ»។
លោក ថា ដារិន បានបន្តថា មន្ត្រីជំនាញបាននិងកំពុងធ្វើការទប់ស្កាត់ការឆ្លងរាលដាលតាមលក្ខណៈបច្ចេកទេស ដូចជា ការបាញ់ថ្នាំសម្លាប់មេរោគ ធ្វើការផ្សព្វផ្សាយពីអនាម័យនិងវិធានការការពារដល់ប្រជាកសិករដែលចិញ្ចឹមជ្រូក និងបិទចរាចរណ៍សត្វចេញចូលក្នុងតំបន់ផ្ទុះជំងឺជាដើម។
ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ លោក តាន់ ផាន់ណារ៉ា និងប្រធានមន្ទីរកសិកម្មខេត្តត្បូងឃ្មុំ លោកហេង ពិសិដ្ឋ ពុំអាចសុំការអត្ថាធិប្បាយបន្ថែមបានទេកាលពីថ្ងៃម្សិលមិញ។
យោងតាមសេចក្តីប្រកាសព័ត៌មានរបស់អង្គការ FAO កាលពីខែមេសា បានបញ្ជាក់ថា ជំងឺប៉េស្តជ្រូកអាហ្រ្វិក មិនមែនជាហានិភ័យដល់សុខភាពមនុស្សទេ ប៉ុន្តែជំងឺនេះ ជាហានិភ័យដល់ជ្រូកស្រុក និងជ្រូកព្រៃ ដោយសារមេរោគអាចរស់បានរយៈពេលយូរក្នុងសាច់ជ្រូកកែច្នៃ សាច់ជ្រូកសម្ងួត និងសាច់ជ្រូកប្រឡាក់ ដែលសាច់ទាំងនោះត្រូវបាននាំទៅកាន់កសិដ្ឋានតាមរយៈការផ្តល់កាកសំណល់ផ្ទះបាយជាចំណីជ្រូក។ សេចក្តីប្រកាសព័ត៌មាន បានបន្ថែមថា បច្ចុប្បន្ន មិនមានវិធីព្យាបាលជំងឺនេះឲ្យជាសះស្បើយ និងមិនទាន់មានថ្នាំបង្ការ ឬការព្យាបាលណាមួយដែលមានប្រសិទ្ធិភាពនៅឡើយ ដូច្នេះនៅពេលដែលសត្វជ្រូកឆ្លងជំងឺនេះ វិធានការតែមួយគត់គឺកម្ទេចហ្វូងជ្រូកដែលទទួលរងផលប៉ះពាល់៕
No comments:
Post a Comment